Жас тарихшылардың «Менің кіші Отаным» атты V Республикалық интеллектуалдық конкурсының қорытындысы

2022 жылғы 3-5 қараша аралығында М.Х. Дулати атындағы Тараз өңірлік университетінің базасында 9-10 сынып оқушыларына арналған жас тарихшылардың «Менің кіші Отаным» атты V Республикалық интеллектуалдық конкурсы өтті. Мерейтойлық конкурсқа Қазақстан Республикасының барлық өңірлерінен 92 оқушы қатысты.

Конкурстың мақсаты – туған елдің тарихына аса қызығушылық танытатын талантты оқушыларды анықтап, олардың шығармашылық қабілетін, қоғамдық белсенділігін дамытуға, өскелең ұрпақтың бойында қазақстандық патриотизм мен азаматтық сезімді қалыптастыру, мектеп оқушыларының тарих және өлкетану бойынша білімін дамыту, ұлттық өзін-өзі тануына және олардың кішкентай Отанына деген мақтанышын арттыру.

Конкурстың негізгі міндеттері: өлкетануға қызығушылық танытқан оқушыларды анықтау және қолдау, туған өлкенің тарихын зерттеуде танымдық қызығушылығын ынталандыру, оқушылардың тарихи өлкетану саласындағы бастамалары мен зерттеу идеяларын анықтау және ынталандыру, жалпы тарих негізінде өз жерін, аймағын, өз қаласын, ауылын сүюге бүкіл қазақстандық бірегейлік пен бірлікті қалыптастыру.

Ақмола облысынан қорытынды кезеңге 4 оқушы, облыстық кезеңнің алтын медаль иегерлері қатысты.

Көкшетау қаласының әл-Фараби атындағы IT лицейінің 10 сынып оқушысы Ербатыр Ернияз «Менің кішкентай Отанымның тарихы» номинациясы бойынша ІІ дәрежелі диплом иегері атанды;

Астана қаласы, №2 «Дарын» облыстық мамандандырылған мектеп-лицей-интернатының 9 сынып оқушысы Дәулетқызы Баян «Менің туған өлкем» номинациясы бойынша ІІІ дәрежелі диплом иегері атанды;

Есіл ауданы, Есіл қаласының № 3 жалпы орта білім беретін мектебінің 10 сынып оқушысы  Түгел Кінәзия «Менің кішкентай Отанымның болашағы» номинациясы бойынша грамотаға ие болды;

Көкшетау қаласы, Абай атындағы дарынды балаларға арналған № 3 облыстық мамандандырылған мектеп-интернатының 10 сынып оқушысы Дулатова Алуа «Кішкентай Отанымның символы» номинациясы бойынша грамотаға ие болды.

Біздің жас тарихшыларымыздың жеңісімен шын жүректен құттықтаймыз!!!