«Дарынды балаларға арналған мамандандырылған мектептердің жағдайы мен даму болашағы» облыстық семинар-кеңесі

Көкшетау қаласында 2022 жылғы 17 қарашада «Білім-инновация» лицей-интернатының базасында «Дарынды балаларға арналған мамандандырылған мектептердің жағдайы мен даму болашағы» атты облыстық семинар-кеңесі өтті.

Семинарға облыстың 5 мамандандырылған білім беру ұйымдарының  директорлары, директорлардың орынбасарлары және мұғалімдері қатысты. Олар: «Білім-инновация» лицей-интернаты, Астана қ., №2 «Дарын» облыстық мамандандырылған мектеп-лицей-интернаты, Көкшетау қ., Абай атындағы дарынды балаларға арналған № 3 облыстық мамандандырылған мектеп-интернаты, Степногорск қ., №4 «Болашақ» облыстық мамандандырылған мектеп-лицей-интернаты, Щучинск қ., IT лицей-интернаты «Білім-инновация».

Семинардың мақсаты: мамандандырылған мектептердің білім беру процесін ұйымдастыру мәселелерін зерделеу, білім беру сапасын арттырудың өзекті мәселелері, олимпиадаларға дайындық.

Ақмола облысының білім басқармасы басшысының орынбасары                          Б.Б. Дюсенова дарынды балаларға арналған мамандандырылған мектептердің жағдайы мен даму болашағы туралы айтты.

Семинарды "Білім-инновация" лицей-интернатының директоры Авджу Гуржан экскурсиямен жалғастырып, қатысушыларға сыныптар мен зертханалардың материалдық-техникалық жабдықталуын көрсетті.

Семинардың практикалық бөлімінде тренингтер, мастер-кластар және презентациялар түрінде "Білім-инновация" лицей-интернатының физика, химия, биология, ағылшын тілі мұғалімдері өз тәжірибелерімен бөлісті. Іс-шара барысында дарынды оқушылар арасындағы кәсіби бағдарлаудың негізгі аспектілері, ата-аналармен жұмыстың маңыздылығы қарастырылды. Теориядан практикаға сүйене отырып, оқушыларды ынталандыру әдістері, командада жұмыс істеу, олимпиадаларға дайындық ерекшеліктері анықталды.

Ақмола облысы білім басқармасының «Ақмола дарыны» дарынды балалар мен талантты жастарды анықтау және қолдау орталығы басшысының орынбасары А.Ж. Алдабергенова өз сөзінде республикалық олимпиадаларды өткізу және ұйымдастыру тәртібін, олимпиадаларға дайындық инновациялық технологияларды әзірлеу және енгізу бойынша педагогикалық тәжірибесімен бөлісті. Ғылыми-зерттеу жұмыстарына және конкурстарға дайындықтың сапалы деңгейін арттыру туралы түсіндірді.

Қатысушылар отбасы мен мектептің бірлескен жұмысы арқылы сапалы білім беру, жеке тұлғаның шығармашылық, рухани және физикалық мүмкіндіктерін дамыту үшін жағдай жасау қажеттігін атап өтті.

Өз тәжірибесімен бөліскен қатысушылар мен мұғалімдерге Ақмола облысы білім басқармасы басшысының атынан алғыс хаттар мен сертификаттар табыс етілді.