Ауыл оқушыларына арналған «Мың бала» бірінші Ұлттық олимпиадасының қорытындысы

Елбасының «Ел үміті» бастамасы аясында, ауылдық мектеп оқушыларының таланттары мен қабілеттіктерін дамыту және қолдау мақсатында Қазақстанда биылғы жылы алғаш рет «Мың бала» Ұлттық зияткерлік олимпиадасы өткізілді. Олимпиаданың басты ұйымдастырушысы - "Елбасы академиясы" корпоративтік қоры.

Олимпиада 2020 жылғы 24 ақпанда басталды. Оған еліміздің ауыл мектептерінің 5 және 6 сыныптарынан 295 мың оқушы қатысты. Олимпиада сырттай және күндізгі кезеңде өткізілді. Сырттай кезең қорытындысы бойынша математика, жаратылыстану, информатика, қазақ тілі, орыс тілі және ағылшын тілі пәндерінің нәтижелері негізінде 5000 оқушы іріктелді.

Ақмола облысы бойынша "Мың бала" ұлттық олимпиадасының І кезеңіне  13731  оқушы қатысты, оның ішінде 5 сынып оқушысы – 7079, 6 сынып оқушысы – 6652. Ағымдағы оқу жылының І және ІІ тоқсанындағы бағалау нәтижелері негізінде 6 пән бойынша 300 оқушы (150 – бесінші сынып оқушылары, 150 - алтыншы сынып оқушылары) олимпиаданың қорытынды кезеңі өтті.

2020 жылғы 21 тамызда өткізілген "Мың бала" бірінші ұлттық олимпиаданың қорытынды кезеңіне 207 оқушы қатысты. Олимпиаданың ІІ кезеңі күшейтілген санитарлық-дезинфекциялық шараларды сақтай отырып Нұр-Сұлтан қ. Назарбаев Зияткерлік мектебінде (қатысушылар саны – 128) және Көкшетау қ. Назарбаев Зияткерлік мектебінде (қатысушылар саны – 79) өткізілді.

Олимпиаданың қорытынды кезеңінің нәтижесінде Ақмола облысының  83 оқушысы жеңімпаз атанды.  Оның ішінде 5 сынып – 49 оқушы, 6 сынып -34 оқушы, Кочетков Роман- № 2 Аршалы орта мектебінің 6-сыныбын бітірген оқушы Республикалық физика-математика мектебінің филиалына қабылдануға ұсынылды, сондай – ақ Бурабай ауданы Оқжетпес орта мектебінің 6 - сыныбын бітірген оқушы Жұмабеков Даут және № 3 Аршалы орта мектебінің 6-сыныбын бітірген оқушы Амантай Бота РФММ филиалына қабылдау үшін резервтік тізімде ұсынылды.

Тізімдегі балалардың заңды өкілдері 7170 (қоңырау шалу тегін) нөмірі бойынша байланыс орталығына хабарласып, мектепке қабылдау үшін қажетті ақпаратты ұсынуы тиіс.

6-сыныпты аяқтаған жеңімпаздар ҚР Білім және ғылым министрлігінің квоталарына сәйкес оқуын «Білім-инновация» лицейлері мен «Дарын» мектептерінде жалғастыруға мүмкіндік алады.

Жоғарыда аталған мектептерге өтініш беру үшін 7170 (қоңырау шалу тегін) нөмірі бойынша байланыс орталығына хабарласып, Нұрсұлтан Назарбаев Қорының www.fnn.kz порталына тіркелу үшін деректер алу қажет.

Тіркеуге қажетті ақпаратты (логин және құпиясөз) алған сон, www.fnn.kz порталындағы жеке кабинетке кіріп қажетті мектепті таңдап, өтініш қалдыру қажет. 

НАЗАР АУДАРЫҢЫЗДАР!

Өтініш беруге арналған парақша 2020 жылдың 5 қыркүйегінде, сағат 15:00-де іске қосылады. Қабылдау мерзімі 7 қыркүйек күні сағат 15:00-те аяқталады. Өтініштерді қарау мерзімі - 3 жұмыс күні.

5 сыныпты аяқтаған жеңімпаздарға арналған ақпарат

Еліміздегі дарынды балаларға арналған мектептердің басым бөлігі оқушыларды 7 сыныптан бастап қабылдайды. Сондықтан 5 сынып аяқтаған жеңімпаздар Елбасы Академиясының қашықтан оқыту мектебінде олимпиададан кейінгі сүйемелдеуге ие болады. 

Елбасы Академиясының қашықтан оқыту мектебінде әр қатысушыға жеке даму жоспарын құруға көмектесетін тьютор бекітіледі, ол оқушымен бірге жеке даму жоспарын жасайды. Қашықтан оқыту мектебігһнде білім алу ақысыз ұйымдастырылады.

Еліміздің үздік мектептерінің жетекші ұстаздары балалардың жаратылыстану-математикалық бағыт және тілдер бойынша білімін  шыңдайды. Жобалық іс-шаралар да қарастырылған. Бір жыл ішінде қатысушылар келесі жылы дарынды балаларға арналған мектептердің 7-сыныбына түсу үшін білімдерін жетілдіре алады. Сабақтар 2 тілде (қазақ және орыс) өткізіледі. Кері байланыс портал, аудио және бейнеконференциялар, телеграм мен whatsapp мессенджерлерінде хабарлама алмасу арқылы жүргізіледі.

Қатысушылардың заңды өкілдері 7170 (қоңырау шалу тегін) нөмірі бойынша байланыс орталығына хабарласып, қашықтан оқыту мектебіне қабылдау үшін қажетті ақпаратты ұсынуы тиіс.

Қосымша ақпаратты мына сілтеме арқылы алуға болады: https://fnn.kz/ru/site/news/view?id=494

Жеңімпаздарды шын жүректен құттықтаймыз! Болашақта білімнің биік шыңдарынан көрінулеріне тілектеспіз!

Олимпиада жеңімпаздарының тізімі мен нәтижелері қоса беріледі.